An nou pote kole pou dekole Minustah

28 Jiyè 1915-28 Jiyè 2011, sa fè 96 lane depi lame enperyalis Etazini yo te debake nan peyi a pou yo te okipe nou pandan 19 lane, touye anpil pitit peyi a, bwote tout richès peyi a. 96 lane aprè gwo pisans enperyalis yo ak Neyokolonyalis yo kouwè : Etazini, Kanada ak Lafrans sèvi ak yon bann gouvènman sousou nan peyi, yo te okipe, tankou : Brezil, Ajantin, Chili elatriye pou fè dappiyanp sou Ayiti. Gwo pisans sa yo sèvi tou ak òganizasyon mondyal ak rejyonal yo tankou : ONU, OEA, Union Europenne, FMI, Banque Mondiale, BID, pou okipe, domine epi eksplwate bout tè papa Dessalines lan.
Depi plis pase 7 lane, gwo peyi enperyalis yo sa anba chapo Loni, sou etikèt MINUSTAH debake nan peyi a, pou yon twazyèm fwa, pou yo kontinye domine pèp ayisyen an, anpeche l chache wout devlopman ak pwogrè. Depi premye Jen 2004, sòlda MINUSTAH yo domestike enstitisyon repiblikèn, yo touye Ayisyen, yo vyole dwa moun yo ak dwa pèp ayisyen an pou l deside pou peyi l, yo foure bouch yo byen fon nan zafè politik peyi a, pou yo di ki moun y ap mete prezidan, Senatè, depite ak Premye Minis, yo fè masak sou moun nan katye popilè yo, yo vyole jenn fi, dènye pou ki pou touye koukou, se nan mwa Oktòb 2010 la, yo lage yon epidemi Kolera nan peyi a ki déjà touye plis pase 7 mil moun.
Nou menm òganizasyon popilè, pwogresis sa yo nou di sitiyasyon sa a pa ka rete konsa, fòk MINUSTAH kite peyi a, Fòk ONG yo sispann souse san mas pòv yo, Fòk gwo pisans enperyalis yo bay Ayiti yon chans pou l pran wout devlopman ak pwogrè.

Nou menm òganizasyon sa yo nou pwofite okazyon 28 jiyè, yon dat madichon pèp ayisyen an pap janm bliye, nan listwa l pou yo egzije yon lòt fwa ankò depa fòs okipasyon LONI an nan peyi Dayiti. Sòlda Minustah yo pap regle anyen nan peyi a, se Kolera li pote, se moun nan katye popilè yo y ap teworize. Nou mande jistis ak reparasyon pou tout viktim Kolera yo. Se pou rezon sa yo, òganizasyon sosyal, popilè ak pwogresis sa yo kise : Tèt Kole Oganizasyon Popilè yo, MODEP, BRIKOURI, MOLEGHAF, GREPS, Batay Ouvriye deside òganize yon sitin devan Ministè Afè Etranjè ki chita Bwavèna, jedi 28 Jiyè 2011 apati de 10 zè nan maten, pou n mande Leta ayisyen pa renouvle manda MINUSTAH nan peyi a. Nan Sitin sa a n ap tann tout moun ki kwè Ayiti pa ka rete anba bòt okipan yo, opresè yo, eksplawatè yo e ki kwè nan bon jan chanjman, nan yon peyi kote tout moun ap viv tankou moun.

Aba Okipasyon
Aba MINUSTAH/Kolera
Aba Rekonstriksyon Pèpè
Viv Ayiti lib
Viv Lit pèp Ayisyen an

ATANSYON ! ATANSYON ! ATANSYON
Okipasyon blan meriken 1915-1934 la te piye richès peyi epi touye plizyè milye pitit tè a, ladan yo : Charlemagne Péralte, Benoit Batraville. Okipasyon LONU an 2004 touye plis pase 7 mil Ayisyen ak Kolera. Kisa n ap tann pou n fout yo deyò nan peyi a ?
Nan sans sa a n ap envite w vin patisipe nan yon sitin k ap fèt devan Ministè Afè Etranjè ki chita Bwavèna, jedi 28 Jiyè a 10 zè nan maten pou egzije depa MINUSTAH, jistis ak reparasyon pou tout viktim Kolera yo.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: